I Kepuh Mati Baan Drowaka
Kacarita di tengah tegale linggah ada punyan kepuh gede tur tegeh. Punyan kayune ento madan I Kepuh. Di carangne ada kedis goak matinggah. I Goak lantas matakon teken I Kepuh. “Ee. Kepuh, saking kaliwat kapiolasan icange nepukin cai. Goban caine layu dudus. Don caine ligir. Buine kulit caine telah babak belur.
I Kepuh lantas masaut, “Aduh, Goak. Saja keto buka munyin caine. Sabilang tengai i pangangon teka mai, sambilanga masayuban laut ngleslesin kulit icange. Aduh ! sing gigis sakitne. Adenan suba mati bandingan teken idup.”
Masaut lantas I Goak, “Ee, Kepuh, eda suba sangsaya. Ada pangupayan icange apanga cai seger. I pangangon apanga suud mai ”
“Nah, cai Goak ! terusang legan caine ! Yening icang seger, icang tusing bani piwal teken legan muah tresnan caine !. Keto pasubayan I Kepuhe. Suba keto I Goak lantas makeber ngalih bebangkan ane berek. Bangken lelipi, bangken siap, muah bangken cicing. Onya bebangkene totonan kagantungang di carang-carang kepuhe. Banyehe paketeltel ulung di tanahe. Bon bengune maimpugan. Uli dugase ento tusing ada pangangon bani kema paek teken I Kepuh.
Makelo-kelo seger I Kepuh. Carange rembiak, donne gadang lum. I Kepuh liang pesan kenehne. Ditu lantas I Goal mamunyi teken I Kepuh, “Nah, buka pasubayan icange malu, jani icang lakar ngingsanang taluh tekening cai. Melahang nyen nyaga ! Yan ada anak nagih wiadin ngusak asik da baanga !”.- Post view : (50)
Basitha Paribasa [ Peribahasa Bali ]
Minab semeton sami kari eling ring peplajahan ritatkala kari masekolah khususne ring pelajahan Bahasa Bali. Napi nika basitha paribasa? Basitha Paribasa inggih punika basa rerasmen wiadin panglengut basa. Kanggen panglengut basa sajeroning mabebaosan kalih magegonjakan, sajeroning basa pakraman wiadin basa pasawitrayan.
Seosan ring punika, Sang Kawi sane sampun wibuhing Basa Basitha, tan mari ngunggahang Basitha Paribasa puniki, sakadi Uperenga miwah Pralambang, sane makardi lengut kakawian punika. Minab semeton sami kari eling napi-napi manten sane ngranjing Basitha Paribasa punika. Kenten taler minab karing eling contone soang-soang.
- Post view : (100)
Bebladbadan
Bebladbadan kruna lingganipun “babad” artinipun tutur jati sane sampun kalampahan riin. Babad taler maarti abas wiadin basang kebo, banteng, utawi kambing. Sasampun polih seselan “el”, pangiring “an” lan kaduipurwayang dados bebladbadan sane mateges kruna bebasan, kaanggen papiringan, saha madue purwakanti (bersajak).
Bebladbadan puniki kawangun antuk lengkara utawi kruna tigang palet. Krunane sane pinih riin apalet dados “giing” utawi “bantang”, krunane sane kaping kalih apalet, “arti sujati (bebasanipun)”, sakadi sampiran, sane ngawangun purwakanti (sajak), krunane sane kaping tiga “arti paribasa”, wiadin suksmanipun, makadi :
- Giing (bantang) : majempong bebek,
- Arti sujati (bebasanipun) : jambul,
- Arti paribasa : ngambul.
Dadosne kecap “mbul” ring kruna “jambul”, mapurwakanti ring kecap “mbul” ring kruna “ngambul”.
Bebladbadan puniki masaih ring “wewangsalan”, sakadi papiring indik kahanan kalih laksanan janma, ring asapunapine sada pedas suksmanipun. Kewanten yening anake mabladbadan, artinipun sane sujati nenten kaucapang, antuk kasengguh sami sampun uning ring artinipun.- Post view : (64)
Wewangsalan
Wewangsalan puniki pateh sakadi tamsil ring Bahasa Indonesia. Wewangsalan kruna lingganipun “wangsal” sane artinipun “lampah”, polih pangiring “an” dados “wangsalan”, kaduipurwayang dados “wewangsalan”, artinipun lelampahan saparipolah kalih kahanan janma, sakadi sasimbing sane sada pedas suksmanipun.
Wewangsalan puniki kawangun antuk lengkara kalih palet utawi carik. Lengkara sane riinan sakadi “sampiran”, indik daging kahiun sang ngucap, kewanten kantun makubda (ilid) suksmanipun. Lengkarane sane pungkuran punika daging sajati, sane nerangan suksmanipun tur mawirama kalih mapurwakanti (bersajak). Wenten taler sane nenten ngucapang lengkarane pungkuran, antuk kasengguh sami anake sampun ngerti ring suksmanipun. Ring asapunapine kawangun antuk lelampahan ring pawayangan. Ki Dalang ngawi satua bawak babaudan, nyimbingin sinalih tunggil sang nonton sane saud (iwang) laksananipun. Wenten taler sane mawangun gambar (karikatur). – Post view : (59)
Papindan
Papindan punika pateh sakadi Sesawangan, kewanten binanipun papindan kruna punika polih “anu suara”, yening sesawangan karahini antuk kruna: buka, kadi, luir, waluya kadi, upami:
- Papindan: Alise medon intara.
- Sesawangan: Alise buka (kadi, luir) don intaran.
Papindan tegesipun: gegambaran buka, wiadin yan bandingan pateh mirib teken…., upami: papindan kedis, tegesipun: wangun gambaran mirib kedis. Mapinda sedih, tegesipun: mirib buka anake sedih. Sane dados pepindan, punika kruna aran sane polih anusuara, luir ipun:
- Boke membotan blayag, tegesipun: rambutne maombak-ombakan.
- Betekan batise meling padi, tegesipun: sekadi beling padi.
- Post view : (48)
wewangsalan
Wewangsalan puniki pateh sakadi tamsil ring Bahasa Indonesia. Wewangsalan kruna lingganipun “wangsal” sane artinipun “lampah”, polih pangiring “an” dados “wangsalan”, kaduipurwayang dados “wewangsalan”, artinipun lelampahan saparipolah kalih kahanan janma, sakadi sasimbing sane sada pedas suksmanipun.
Wewangsalan puniki kawangun antuk lengkara kalih palet utawi carik. Lengkara sane riinan sakadi “sampiran”, indik daging kahiun sang ngucap, kewanten kantun makubda (ilid) suksmanipun. Lengkarane sane pungkuran punika daging sajati, sane nerangan suksmanipun tur mawirama kalih mapurwakanti (bersajak). Wenten taler sane nenten ngucapang lengkarane pungkuran, antuk kasengguh sami anake sampun ngerti ring suksmanipun. Ring asapunapine kawangun antuk lelampahan ring pawayangan. Ki Dalang ngawi satua bawak babaudan, nyimbingin sinalih tunggil sang nonton sane saud (iwang) laksananipun. Wenten taler sane mawangun gambar (karikatur). – Post view : (181)