Dewi Gangga Ngrecak

275

Olih : Nyoman Manda

Wawu miragi krepyakan suaran toyan tukadé sané deres punika, sakadi kasentuh ngenin dupa tangan Sang Prabu. Ida ngusap-usap pangaksian, sakadi ngrempini éling ring sukané riin sadaweg wawu manggihin Déwi Gangga, anak istri ayu, ring luah ageng punika.

Sué ida bengong, éling ring pinunas ajinné mangda digelis wénten putu mangda wénten nyarengin ida malila cita ring puri sasampuné ida pacang maancang-ancang ngwana prasta. Malih sang prabu kagiat ring kayun, dados driki malih Déwi Gangga malila cita ring genahé sané riin ri tatkala kapertama ida matemu wirasa lan kadaut kayun ring sang déwi. Tan sué Prabu Sentanu polih maangen-angen krana miragi tangis putran idané sané wau embas lan sungsut ida maangen-angen manggihin pramésurin idané jeg sakadi anak anom akidik tan ngenah sléngsongan angga ida yadiastun dibi ngembasang putra sané dahat rupawan.

Lan dayang-dayangé sami pada mapangsegan ri tatkala manggihin Déwi Gangga girang nrajang ka tengahing luah ageng sambilang ida matembang raré ngayunang putran ida sané kantun barak. Putrané katimang-timang, nanging boya ja alus sakadi tingkah sangi ibu ring putra sayang belahan jiwa pramanané. Tingkah Déwi Gangga ring putran idané sakadi anak ten patut anut ring tingkah sang ibu sujati. Putrané katimang-timang, kaayunang keras pisan lan kaentungan menék raris kajangkuak malih sakadi anak alit sampun mayusa kalih warsa. Makejang anaké sané manggihin pada nyerit manggihin anak alit kantun barak kaentungang sakadi ngentungang batun tukad luahé.

“Sampunang ratu, ila-ila dahat putran ratuné menawi pacang runtuh ka tukadé,” wénten panyeroan nyerit ajrih pisan.

“Apa orahang nyai?” Déwi Gangga malih ngentungang okané menék lan kajangkuak aji tangan asiki, kaanggar sahasa mademi.

“Ratu sampunang,” malih panyeroané sané tiosan nyerit.

“Eda nyai liunan munyi. Jani tragia nyai ajak makejang, gelah bakal masiram,” Déwi Gangga maancang-ancang pacang nglangi sareng okan idané.

“Adi agung,” prabu Sentanu matangi nyerit maulap-ulap nambakang.

“Napi Bli agung?”

“Ila-ila dahat adi agung, becikang nepining luah mangda kaabih sareng panyeroané sami,” alon alus Prabu Sentanu maucap.

“Bli agung bakal nimbaang tiang, napi ngetaraang tiang?” sada nyanteng Déwi Gangga ngandika lan tangané ngejer ngamel okané. Kuusan toyan luahé ngancan deres. Miragi pangandikan Déwi Gangga asapunika Prabu Sentanu maplengek krana éling ring samayané tan pacang ngwatesin sahanan tingkah Déwi Gangga napi malih pacang nimbaang. Ri tatkala Prabu Sentanu maangen-angen éling ring semaya jeg sagét rauh toya ageng nrebak ngakuubin Déwi Gangga sakadi ngampehang kahanannyané. Samian anaké nyerit ngaksi baya sané nibén Déwi Gangga lan samian malih mapangsegan ri tatkala manggihin tangan Déwi Gangga kakaliha puyung krana okan dané sampun kaanyudang toya ageng.

Jerit tangis lan kasenduan Déwi Gangga sareng Prabu Sentanu tan prasida ngwaliang okan idané sané sampun kelem kaanyudang toya ageng.

~ Article view : [392]

SHARE
Previous articleKarmapala
Next articleDewi Gangga makenyem